22 de Maio: Folga Xeral no Ensino!
21 Maio 2012
O Partido Comunista de Galicia e Xuventude Comunista defenden que hai razóns máis que suficientes para a folga xeral en educación o día 22 de maio de 2012 e fan un chamamento a toda a comunidade educativa para que apoie e sómese a esta xornada de paro contra os recortes educativos.
O Partido Comunista de Galicia e a Xuventude Comunista apoian a folga xeral de Educación convocada para o 22 de maio pola Plataforma Estatal pola Escola Pública para protestar contra os recortes educativos e en defensa dos servizos públicos ante o ataque sen precedentes ao sistema público educativo.
Os recortes e medidas que están a adoptar os últimos gobernos e as comunidades autónomas traduciranse nun recorte dos orzamentos educativos de entre o 25% e o 30%. Este brutal recorte, engadido ao que xa sufrimos estes últimos anos, suporá un retroceso histórico na educación pública do noso país mentres se transvasan recursos á educación privada e fináncianse os seus centros con diñeiro público. Ademais, as medidas adoptadas e impostas por Real Decreto Lei van supor unha masificación das aulas, a intensificación da xornada do profesorado e o despedimento de miles de mestres e mestras, a precariedade laboral, a paralización de novos ciclos de FP, a privatización de servizos educativos, o aumento de taxas universitarias, a diminución de bolsas e o despedimento masivo de profesorado universitario máis precario. Este novo atentado contra a rede pública de centros educativos repercutirá gravemente na calidade e equidade do ensino público, reforzando así a tendencia dominante, aplicada polo PP alá onde goberna, de facer da educación pública unha rede subsidiaria e sen recursos, dirixida sobre todo aos alumnos que conten con menos recursos e sexan rexeitados polo sector privado.
A educación é un dereito básico establecido e garantido na nosa Constitución. E esta debe ser de calidade e xeradora de igualdade de oportunidades para toda a cidadanía.
Con todo, a política educativa do Goberno consiste en que a educación de calidade o sexa unicamente para as clases privilexiadas. Non estamos dispostos a permanecer impasibles ante este suicidio social e educativo. A Educación Pública é de todos e para todos.
Debemos combater, con todos os medios ao noso alcance, este tipo de políticas por atentar contra a cohesión social, dado o seu carácter elitista e segregador do alumnado e por reforzar as tendencias privatizadoras do servizo público educativo, único garante do dereito universal á educación en condicións de igualdade e democracia.
A convocatoria de folga xeral na educación e outras accións de loita o próximo 22 de maio é un fito histórico, posto que é a primeira vez que no noso país convócase unha xornada de folga desde a Educación Infantil até a Universidade. Así mesmo, é a primeira vez que é apoiada por toda a comunidade educativa: organizacións sindicais, nais e pais de alumnos, estudantes e movementos de renovación pedagóxica.
Co noso apoio e adhesión explícitos, chamamos aos traballadores e traballadoras do Ensino e a toda a cidadanía a participar nesta mobilización e á asistencia ás manifestacións que se celebrarán en todas as comunidades o próximo 22 de maio.
Pola educación pública e en contra dos recortes.
A educación non se vende, deféndese!
